Gold Price : श्रावण महिना सुरू होताच सणवार आणि लग्नसराईची चाहूल लागली आहे. यामुळे देशभरातील सराफा बाजारात पुन्हा एकदा ग्राहकांची गर्दी वाढण्याची शक्यता आहे. मात्र, याच काळात सोने आणि चांदीच्या किमतीत चढ-उतार सुरूच आहेत. विशेष म्हणजे, अमेरिकेचे माजी राष्ट्राध्यक्ष डोनाल्ड ट्रम्प (Donald Trump) यांनी जाहीर केलेल्या टॅरिफ निर्णयानंतर भारतीय बाजारात सोन्याच्या दरात मंदी दिसून आली आहे.
आजचा सोने आणि चांदीचा दर
भारतीय मल्टी कमॉडिटी एक्सचेंज (MCX) वर गुरुवारी सोन्याचा दर मागील बंद 98,983 रुपयांच्या तुलनेत किंचित कमी होऊन 98,900 रुपये प्रति 10 ग्रॅमवर उघडला. सुरुवातीच्या व्यवहारात तो आणखी घसरून 98,801 रुपये प्रति 10 ग्रॅमवर पोहोचला.
चांदीच्या दरातसुद्धा घसरण झाली. मागील बंद 1,12,864 रुपयांच्या तुलनेत किंमत एक टक्का घसरून 1,12,108 रुपये प्रति किलोवर आली. दिवसभरात ती आणखी खाली येत 1,11,270 रुपये प्रति किलोपर्यंत पोहोचली.
मुंबई सराफा बाजारात आज 22 कॅरेट सोन्याचा दर 91,700 रुपये प्रति 10 ग्रॅम तर 24 कॅरेटसाठी 1,00,030 रुपये आहे. चांदीचा दर 2,000 रुपयांनी घसरून 1,15,000 रुपये प्रति किलो झाला आहे.
आंतरराष्ट्रीय बाजारातील स्थिती
अमेरिकन फेडरल रिझर्व्हने व्याजदर स्थिर ठेवले असून सप्टेंबरमध्ये दरकपातीची शक्यता कमी झाली आहे. तरीदेखील, अमेरिकेच्या अलीकडील टॅरिफ घोषणेमुळे निर्माण झालेल्या व्यापार अनिश्चिततेच्या पार्श्वभूमीवर सोन्याची आंतरराष्ट्रीय बाजारातील मागणी थोडीशी वाढली आहे.
स्पॉट गोल्डचा दर 0.4% वाढून प्रति औंस $3,286.99 झाला आहे. याआधीच्या सत्रात हा दर 30 जूननंतरच्या नीचांकी पातळीवर गेला होता. अमेरिकन गोल्ड फ्युचर्स 0.5% घसरून $3,282.10 वर बंद झाले.
किंमतीतील चढ-उताराचं कारण
तज्ज्ञांच्या मते, सोन्या-चांदीच्या भावातील चढ-उतार हे दोन मुख्य घटकांवर अवलंबून आहेत –
-
अमेरिकन फेडरल रिझर्व्हची व्याजदर धोरणं
-
जागतिक व्यापारातील तणाव आणि टॅरिफ निर्णय
डोनाल्ड ट्रम्प यांच्या टॅरिफ घोषणेचा थेट परिणाम भारतीय सोनेबाजारावर दिसत आहे. जागतिक बाजारातील अनिश्चिततेमुळे गुंतवणूकदार मौल्यवान धातूंमध्ये सुरक्षित गुंतवणुकीकडे वळत आहेत.
