Girish Mahajan : वरणगाव येथील वीरगती प्राप्त जवान अर्जुन लक्ष्मण बाविस्कर यांच्या पार्थिवाचे दर्शन घेत असताना जलसंपदा मंत्री गिरीश महाजन यांच्या डोक्याला लोखंडी रॉड लागल्याने त्यांना दुखापत झाली आहे. घटना घडल्यावर गिरीश महाजन यांना तत्काळ वरणगाव येथील निमजाय हॉस्पिटलमध्ये उपचारांसाठी नेण्यात आले.
प्राथमिक उपचार घेतल्यानंतर त्यांनी वीर जवान अर्जुन बाविस्कर यांच्या अंत्ययात्रेत भाग घेतला आणि त्यानंतर महत्त्वाच्या बैठकीसाठी नाशिककडे रवाना झाले. वरणगाव शहरात वीर जवान अर्जुन बाविस्कर यांना मानवंदना देण्यासाठी मंत्री गिरीश महाजन आले होते. ते मिल्ट्री ट्रॅकवर चढत असताना त्यांच्या डोक्याला ट्रॅकच्या वरच्या लोखंडी रॉडने धक्का दिला.
यामुळे रक्तस्राव होऊ लागला. तरीही, गिरीश महाजन यांनी वीर जवान अर्जुन बाविस्कर यांना पुष्पचक्र अर्पण करत त्यांना श्रद्धांजली अर्पण केली. पण, डोक्याचे रक्त थांबत नसल्यामुळे उपस्थित माजी नगराध्यक्ष सुनील काळे, कामगार नेते मिलिंद मेढे, भाजपा शहराध्यक्ष सुनील माळी आणि शेख आखलाक यांच्या मदतीने महाजन यांना तातडीने रुग्णालयात नेण्यात आले, जिथे डॉ. निलेश पाटील यांनी त्यांचे प्राथमिक उपचार केले.
डोक्याला इजा झाल्यानंतरही गिरीश महाजन यांनी वीर जवान अर्जुन बाविस्कर यांच्या कुटुंबाला भेट देऊन सांत्वन केले. ते म्हणाले, “अर्जुन बाविस्कर यांना देशसेवा करत असताना वीर मरण आले याचे दुःख आम्हाला आहे. आम्ही आणि राज्य सरकार त्यांच्या कुटुंबाच्या दुःखात सहभागी आहोत.”
त्यानंतर, गिरीश महाजन डोक्याची इजा असूनही अंत्ययात्रेत तिरंगा सर्कलपर्यंत चालत गेले, जिथे हजारो वरणगावकरांनी त्यांना मानवंदना दिली. त्यानंतर, महाजन यांनी नाशिकमध्ये महत्त्वाच्या बैठकीसाठी रवाना होण्याची गरज असल्याचे सांगितले आणि तातडीने नाशिककडे मार्गस्थ झाले.
