कार्यक्रमात विद्यार्थ्यांशी संवाद साधताना त्यांनी एक साधा पण अर्थपूर्ण प्रश्न विचारला. “एखादा हिंदी चित्रपट आठवतो का?” यावर विद्यार्थ्यांनी ‘धुरंधर’ हे नाव घेतलं. पुढे त्या चित्रपटातील नायक कोण, असा सवाल केला असता विद्यार्थ्यांनी अक्षय खन्नाचं नाव सांगितलं. हे ऐकताच आमदारांनी विद्यार्थ्यांकडे हात जोडले आणि खंत व्यक्त केली. आज परिस्थिती अशी आहे की वाईट भूमिका करणारा लक्षात राहतो, पण चांगली भूमिका करणारा विसरला जातो. हे चित्र बदलायला हवं, अशी अपेक्षा त्यांनी विद्यार्थ्यांसमोर व्यक्त केली.

संघर्षाच्या काळातही राजकारण सुरूच आहे

भाषणात पुढे बोलताना त्यांनी राजकारणातील संघर्षाचीही जाणीव करून दिली. समाजात सकारात्मक काम करणाऱ्यांना पुरेसं श्रेय मिळत नाही, तर नकारात्मक गोष्टी अधिक गाजतात, असं सूचक वक्तव्य त्यांनी केलं. “आम्ही राजकारणात संघर्ष करत आहोत. कठीण काळ आहे, पण तरीही चांगल्या गोष्टींसाठी उभं राहणं महत्त्वाचं आहे,” असं सांगत त्यांनी विद्यार्थ्यांना प्रेरणा दिली. जीवनात नायक बनायचं असेल, तर स्वतःच्या कृतींमधून ओळख निर्माण करावी लागते, असा संदेशही त्यांनी दिला.

भाजप प्रवेश आणि मंत्रीपदाच्या चर्चांना उधाण

दरम्यान, राजकीय वर्तुळात आमदारांच्या भूमिकेबाबत चर्चा रंगताना दिसत आहे. काही दिवसांपूर्वी दिल्लीमध्ये केंद्रीय गृहमंत्र्यांची भेट झाल्याने त्यांच्या पुढील राजकीय वाटचालीबाबत तर्क-वितर्क सुरू झाले आहेत. विशेषतः एका मंत्र्याच्या अडचणी वाढल्यानंतर मंत्रिमंडळात रिक्त झालेल्या जागेबाबत नवी चर्चा उभी राहिली आहे. त्या जागेसाठी कोणाची वर्णी लागणार, याबाबत अनेक नावे पुढे येत असून, या आमदारांचं नावही त्यात आघाडीवर असल्याचं बोललं जात आहे.

न्यायालयीन निर्णयानंतर संबंधित मंत्र्याचा राजीनामा स्वीकारण्यात आल्यानंतर राजकीय समीकरणं वेगाने बदलू लागली. नैतिक जबाबदारीचा मुद्दा, विरोधकांचा दबाव आणि पक्षांतर्गत हालचाली यामुळे मंत्रिमंडळ फेररचनेची शक्यता वाढली आहे. या पार्श्वभूमीवर पुन्हा एकदा मंत्रीपद मिळण्याची शक्यता असल्याच्या चर्चा राजकीय वर्तुळात ऐकू येत आहेत. मात्र, याबाबत अद्याप अधिकृत घोषणा झालेली नाही.