शिवसेनेचा खांदा वापरून इटालियन माफियांचा गोळीबार; भाजपने काँग्रेसह शिवसेनेला घेरले

दिल्ली | भाजपने पुन्हा काँग्रेस आणि ठाकरे सरकारला घेरण्याचा प्रयत्न केला आहे. अभिव्यक्ती स्वातंत्र्याचा मुद्दा उचलून धरून भाजपने टीका केली आहे. भाजपचे प्रवक्ते संबीत पात्रा यांनी बुधवारी पत्रकार परिषदेत काँग्रेसच्या हंगामी अध्यक्षा सोनिया गांधी यांच्यावर टीका केली.

मुसोलिनीचा उजवा हात असलेल्या पित्याची मुलगी भारतात माफियाराज आणू पाहत आहे. अभिव्यक्ती स्वातंत्र्याची गळचेपी करणे, हे माफियांचे प्रमुख वैशिष्ट्य असते. त्यामुळे महाराष्ट्रातून शिवसेनेच्या खांद्यावरून गोळीबार करण्याचे काम इटालियन माफिया करीत आहे अशी जहरी टीका संबीत पात्रा यांनी केली.

ज्या प्रकारे रिपब्लिक टीव्हीचे पत्रकार अर्णब गोस्वामी यांना अटक करण्यात आली त्यावरून असे दिसत आहे की, इटालियन माफिया सैरभैर झाले आहेत. देशात २०१४ आधी इटालियन घराण्यातील व्यक्तीचेच सरकार होते.

आतादेखील आई आणि मुलाचे इटालियन सरकार मीडियाच्या स्वातंत्र्यावर हल्ला करत आहे. एवढेच नाही तर मनासारखा निकाल लागला नाही म्हणून देशाच्या सरन्यायाधीश यांच्यावर टीका करून त्यांचाविरोधात महाभियोग चालवण्याची तयारी केली होती.

इटालियन माफियांनी नवीन साथीदार गोळा केले आहेत. समित ठक्कर या सर्वसामान्य माणसाला त्रास दिला जात आहे.पंतप्रधान नरेंद्र मोदी यांना दररोज हिटलर म्हणणारे काँग्रेसचे नेते लोकशाहीचे खरे मारेकरी आहेत. माफियांची काही वैशिष्ट्य असतात.

लोकशाहीची हत्या, भ्रष्टाचार, ड्रग्सचा व्यापार आवडणे आणि तरीदेखील ते लोकशाहीवादी असल्याचा दावा करतात. त्याचप्रमाणे सोनिया गांधी देशात लोकशाही धोक्यात असल्याचे लेख लिहितात तर दुसरीकडे राहुल गांधी प्रेमाचे राजकारण करण्याचा दावा करतात, अशी टीका संबीत पात्रा यांनी सोनिया गांधी यांच्यावर केली आहे.

Comments are closed, but trackbacks and pingbacks are open.