Crime News : बंगळुरूमधील एका खाजगी नर्सिंग कॉलेजमध्ये शिकणाऱ्या २२ वर्षीय विद्यार्थिनीने केलेला सामूहिक बलात्काराचा दावा खोटा असल्याचे पोलिस तपासात स्पष्ट झाले आहे. प्रारंभिक चौकशी आणि सीसीटीव्ही फुटेज, तसेच दोन्ही पक्षांच्या व्हॉट्सॲप संवादांवरून हा प्रकार संमतीने घडल्याचे उघड झाले. विद्यार्थिनीने तिच्या मानेवर आलेले ओरखडे आणि लव्हबाईट्सवरून प्रियकराला चुकीची माहिती देण्यासाठी ही खोटी कहाणी रचली होती, असे पोलिसांनी सांगितले. या प्रकरणी सध्या तपास सुरू आहे. तसंच, संबंधित टॅक्सी ड्रायव्हर पोलीस ताब्यात असून त्याने स्वतःला निर्दोष असल्याचे सांगितले आहे.
काय आहे प्रकरण?
प्रकरण २ डिसेंबरच्या रात्री घडले. २२ वर्षीय विद्यार्थिनी, जी केरळची मूळ राहणारी आहे, मडीवाला पोलीस स्टेशनमध्ये पोहोचली आणि तिने तातडीने तक्रार दाखल केली की सर एम. विश्वेश्वरैया टर्मिनलजवळ एका टॅक्सी ड्रायव्हर आणि त्याच्या मित्रांनी तिच्यावर सामूहिक बलात्कार केला. पोलिसांनी ताबडतोब सामूहिक बलात्काराचा गुन्हा दाखल केला आणि प्रकरण बनसवाडी पोलीस स्टेशनकडे हस्तांतरित करण्यात आले.
आरोपी टॅक्सी ड्रायव्हर ३३ वर्षांचा असून त्याला दोन मुले आहेत आणि पत्नी गृहिणी आहे. पोलिस चौकशीत त्याने बारंबार स्वतःला निर्दोष असल्याचा दावा केला.
सीसीटीव्ही आणि डिजिटल पुरावे
पोलिसांनी घटनास्थळी आणि जवळील भागातील सीसीटीव्ही फुटेज तपासले असता, दोघेही रात्री ११.३० वाजल्यापासून ते पहाटे ५.३० पर्यंत स्टेशनवर एकत्र दिसले. विद्यार्थिनीने म्हटलेले कथित साथीदार पोलिसांना कुठेही दिसले नाहीत. फुटेजमध्ये स्पष्ट दिसत होते की दोघेही रात्रीच्या वेळी एकत्र फिरत होते आणि पुन्हा गाडीत बसत होते. अखेरीस, विद्यार्थिनी एर्नाकुलम ट्रेनने रवाना झाली.
पोलिसांनी टॅक्सी ड्रायव्हरचे व्हॉट्सॲप मेसेजेस देखील तपासले. त्यामध्ये दिसले की ३ डिसेंबरपासून विद्यार्थिनीने त्याला अनेक मेसेजेस पाठवले, ज्यामध्ये दोघांमध्ये संमतीने झालेल्या भेटीचा उल्लेख होता आणि संबंध ठीक असल्याचे दिसून आले.
विद्यार्थिनीची कबुली
चौकशीत विद्यार्थिनीने कबूल केले की तिने ही खोटी तक्रार तिच्या प्रियकराला उत्तर देण्यासाठी केली होती. मानेवर आलेले लव्हबाईट्स आणि ओरखडे टॅक्सीमध्ये वेळ घालवताना आलेले होते. ड्रायव्हरने सांगितले की तो विद्यार्थिनीला ओळखत होता कारण दोघेही केरळचे होते आणि स्टेशनवर तिला सोडले. ही घटना पोलिस तपासात उघडकीस आली असून, प्रकरणातील आरोपी निर्दोष असल्याचे पोलिसांनी स्पष्ट केले आहे.
