Ayush Komkar Case Update : गणपती विसर्जनाच्या आदल्या दिवशी पुण्यातील (Pune City) नाना पेठेत झालेल्या भीषण टोळीयुद्धात आयुष कोमकर (Ayush Komkar) याचा निर्घृण खून करण्यात आला होता. या खुनानंतर फरारी झालेल्या आंदेकर टोळीतील चौघांना पोलिसांनी गुजरात (Gujarat Border) सीमेवरून अटक केली आहे. स्थानिक न्यायालयातून ट्रान्झिट रिमांड मिळाल्यानंतर सोमवारी या चौघांना पुण्यातील मकोका न्यायालयात हजर केले जाणार आहे. मात्र, टोळीचा म्होरक्या बंडू आंदेकर (Bandu Andekar) याचा मुलगा कृष्णा अजूनही फरार असून गुन्हे शाखेची पथके त्याच्या मागावर आहेत.

घरातून सोनं, रोकड आणि कागदपत्रांचा मोठा मुद्देमाल

या हत्याकांडाच्या तपासादरम्यान पोलिसांनी बंडू आंदेकर यांच्या राहत्या घराची झडती घेतली. या कारवाईत तब्बल ७७ तोळे सोन्याचे दागिने, सुमारे अडीच लाख रुपये रोकड, चांदीचे सामान, मोटार तसेच जमीन व्यवहार आणि बँक संबंधित महत्त्वाची कागदपत्रं जप्त करण्यात आली. त्याचप्रमाणे वृंदावनी वाडेकर (Vrundavani Wadekar) आणि तिच्या मुलांसह इतर साथीदारांच्या घरातून २१ हजार रुपयांची रोकड, १६ मोबाईल फोन आणि दागिन्यांच्या पावत्या जप्त झाल्या आहेत.

पोलिसांचा सतत शोधमोहीम सुरू

गुन्हे शाखा उपायुक्त निखिल पिंगळे (Nikhil Pingale) यांनी दिलेल्या माहितीनुसार, गुजरातमधून ताब्यात घेतलेल्या आरोपींना सोमवारी पुण्यातील विशेष न्यायालयात उभं केलं जाणार आहे. अजूनही एक आरोपी फरारी असल्याचं स्पष्ट करण्यात आलं आहे.

आधीच्या खुनातून निर्माण झालेले वाद

ही घटना माजी नगरसेवक वनराज आंदेकर (Vanraj Andekar) यांच्या खुनाच्या प्रकरणाशी जोडली जाते. या प्रकरणात आरोपी ठरलेल्या गणेश कोमकर (Ganesh Komkar) याचा मुलगा आयुषचा ५ सप्टेंबर रोजी गोळीबार करून खून करण्यात आला होता. या हत्येनंतर सीसीटीव्ही तपासाच्या आधारे पोलिसांनी यश पाटील (Yash Patil) आणि अमित पाटोळे (Amit Patole) या दोघांना अटक केली होती. त्यानंतर बंडू आंदेकर आणि त्याच्या साथीदारांना बुलढाणा (Buldhana Area) परिसरातून अटक करण्यात आली होती. मात्र आंदेकर कुटुंबातील पाच जण फरार होते. पोलिसांचे गुप्त पथक त्यांच्यापर्यंत पोहोचण्याचा प्रयत्न करत आहे.