Dhananjay Munde : बीडमधील मस्साजोग गावाचे सरपंच संतोष देशमुख यांच्या हत्येच्या प्रकरणात दुसऱ्या सुनावणीला सुरुवात झाली आहे. या सुनावणीमध्ये विशेष सरकारी वकील उज्ज्वल निकम यांनी प्रकरणातील तपशील मांडत कोर्टासमोर आरोपींच्या भूमिकेबद्दल माहिती दिली. तसेच, मुख्य आरोपींपैकी सुदर्शन घुले, जयराम चाटे आणि महेश केदार यांनी पोलिसांकडे हत्येची कबुली दिल्याची माहिती समोर आली आहे. या प्रकरणाच्या पार्श्वभूमीवर मराठा समाजाला आरक्षण मिळावे, या मागणीसाठी आंदोलन करणारे मनोज जरांगे पाटील यांनी पुन्हा इशारा दिला आहे.
उज्ज्वल निकम यांनी सांगितले की, हे प्रकरण आरोप निश्चितीसाठी तयार आहे. तथापि, आरोपींच्या वकिलांनी कागदपत्रांची अनुपलब्धता दाखवून आरोप निश्चित करण्यास विलंब होऊ नये, अशी विनंती केली आहे. पुढील सुनावणी १० एप्रिल रोजी होणार आहे.
संतोष देशमुख यांच्या हत्येची कारणे स्पष्ट करत असताना सुदर्शन घुले याने कबूल केले की, पवनचक्की कंपनीकडून खंडणी मागण्यात संतोष देशमुख हे अडथळा होते. तसेच, देशमुख आणि मस्साजोग गावातील ग्रामस्थांनी त्याच्या वाढदिवशी मारहाण केली होती आणि त्याचे व्हिडिओ व्हायरल केल्यानंतर त्याला हा निर्णय घ्यावा लागला. हत्येपूर्वी घुलेने हॉटेल तिरंगेत विष्णू चाटेसोबत बैठक घेतल्याचेही कबूल केले आहे.
मनोज जरांगे पाटील बीड प्रकरणात अतिशय सक्रीय असून, मराठा आरक्षण आणि संतोष देशमुख हत्येप्रकरणी महायुती सरकारवर सातत्याने टीका करत आहेत.
जरांगे पाटील यांनी भाजपचे नेते धनंजय मुंडे यांच्यावर गंभीर आरोप करत, त्यांच्या संघटित गुन्हेगारीसाठी त्यांनीच मोर्चे आणि आंदोलनांचे आयोजन केले असल्याचा दावा केला. “धनंजय मुंडे यांच्या गुन्हेगारी कृतीमुळेच हत्येचे आदेश दिले गेले,” अशी गंभीर टीका करत जरांगे पाटील यांनी इशारा दिला की, यापुढे मुंडे यांच्या नादी लागल्यास ते त्यांना सोडणार नाहीत.
त्यांनी ही बाब इशाऱ्याने व्यक्त करत सांगितले की, सरकारने धनंजय मुंडे यांना वाचवण्याचा प्रयत्न केला आहे. “याप्रकरणात मुंडे ३०२ कलमांतर्गत आरोपी होण्यास हवेच,” अशी मागणी त्यांनी केली आहे.
