Aaditya Thackeray on Sanjay Shirsat : राज्यातील राजकारण पुन्हा एकदा खळबळजनक वळणावर आहे. शिवसेना (Shiv Sena UBT) पक्षाचे नेते व युवासेनेचे प्रमुख आदित्य ठाकरे (Aaditya Thackeray) यांनी शिंदे गटाचे मंत्री संजय शिरसाट (Sanjay Shirsat) यांच्यावर जोरदार हल्ला चढवला आहे. कारण म्हणजे – एक व्हिडिओ. या व्हिडिओमध्ये संजय शिरसाट एका बेडरूममध्ये आरामात बसून सिगारेट ओढताना दिसत आहेत आणि त्यांच्याजवळ पैशांनी भरलेली वाटणारी बॅग ठेवलेली दिसते.
या व्हिडिओवर प्रतिक्रिया देताना आदित्य ठाकरे म्हणाले, “गेल्या दोन-अडीच वर्षांत देशांतर्गतच नव्हे, तर ३३ देशांमध्ये गद्दारीची नोंद झाली आहे. ‘५० खोके एकदम ओके’ या आरोपाला आता प्रत्यक्ष चित्रफीतच समर्थन देत आहे. आज कदाचित त्या ५० खोकेपैकी एक खोका आपल्याला पाहायला मिळत आहे.”
त्यांनी पुढे बोलताना मुख्यमंत्री एकनाथ शिंदे (Eknath Shinde) यांच्यावरही अप्रत्यक्ष टीका केली. “या मंत्र्यावर इतके आरोप झाले आहेत, तरीही मुख्यमंत्र्यांनी केवळ चौकशी लावली. प्रत्यक्ष कारवाई करणार का? ही गँग सध्या सत्तेत आहे आणि यांचेच ‘बॉस’ भ्रष्टनाथ मिंधे (संपूर्ण नाव न घेता सूचक टोला) काही करतील असं वाटत नाही,” असं म्हणत आदित्य यांनी थेट सरकारचं नाव न घेता मोठा आरोप केला.
आयकर विभागाने नोटीस बजावली
या प्रकरणात संजय शिरसाट यांना आयकर विभागाने नोटीस बजावली आहे. तरीही ते ऐटीत वागत असल्याचेही आदित्य ठाकरे यांनी स्पष्ट केलं. “काल कोण दिल्लीला गेलं, कोण कोणाला भेटलं, याच्या यादी आमच्याकडे आहेत. आता इतक्या निर्लज्जपणे राजकारण चालतंय, ही शोकांतिका आहे,” असं ते म्हणाले.
संजय शिरसाट यांची बाजू
संजय शिरसाट यांनी या व्हिडीओवर प्रतिक्रिया देताना स्पष्ट केलं, “व्हिडिओत दिसणं माझं स्वतःचं घर आहे, माझीच बेडरूम आहे आणि त्या बॅगेमध्ये काही पैसे नाहीत, तर फक्त कपडे आहेत.” त्यांनी असा दावा केला की, हा व्हिडिओ केवळ टार्गेट करण्यासाठी वापरला जात आहे. “पैशांसाठी बॅग ठेवण्यापेक्षा अलमारीच वापरली असती,” असंही ते म्हणाले.
राजकीय वाद पेटणार?
सध्याची परिस्थिती पाहता, एकामागोमाग एक आमदार अडचणीत सापडताना दिसत आहेत. याआधी संजय गायकवाड (Sanjay Gaikwad) यांच्या मारामारीच्या व्हिडिओनंतर आता संजय शिरसाट यांचा ‘पैशाच्या बॅगेचा व्हिडिओ’ समोर आल्यानं राज्य सरकारवरील दबाव वाढण्याची शक्यता आहे. विरोधकांचा सूर अधिक तीव्र होणार हे नक्की.
