Thane Election : मुंबईत शाखाभेटींच्या माध्यमातून वातावरण तापवत असतानाच, ठाण्यात आता ‘ठाकरे ब्रँड’चा प्रचार सुरू होणार आहे. उद्धव ठाकरे (Uddhav Balasaheb Thackeray) आणि राज ठाकरे (Raj Thackeray ) या दोन्ही नेत्यांची रणनीती आता ठाणे शहरात दिसणार आहे. गुरुवारी राज ठाकरे ठाण्यातील शिवसेना तसेच मनसेच्या शाखांना भेटी देणार असून, सोमवारी गडकरी रंगायतन परिसरात जाहीर सभेच्या माध्यमातून ते थेट मतदारांशी संवाद साधणार आहेत. या पार्श्वभूमीवर उबाठा व मनसेच्या उमेदवारांमध्ये उत्साह संचारलेला आहे.
ठाण्यातील प्रचारात सत्ताधारी युतीने आधीच आघाडी घेतलेली आहे. एकनाथ शिंदे (Eknath Shinde) यांनी रोड शोच्या माध्यमातून युतीच्या उमेदवारांसाठी शक्तिप्रदर्शन केले, तर देवेंद्र फडणवीस (Devendra Fadnavis) यांनी गडकरी रंगायतन नाट्यगृहात घेतलेल्या संवादातून निवडणुकीसाठीची भूमिका स्पष्ट केली. या प्रचाराच्या धामधुमीत आता गुरुवारी राज ठाकरे ठाण्यातील चंदनवाडी, शिवाईनगर आणि मनोरमा नगर येथील शाखांमध्ये हजेरी लावणार असल्याची माहिती जिल्हाध्यक्ष अविनाश जाधव यांनी दिली.
युतीनंतर प्रथमच ठाण्यात ठाकरे बंधूंचा प्रचार
ठाकरे बंधूंच्या युतीनंतर प्रथमच राज ठाकरे ठाण्यात प्रचारासाठी येत आहेत. याआधी त्यांनी मनसेसाठी स्वतंत्र प्रचारसभा घेतल्या होत्या. लोकसभा निवडणुकीच्या वेळी कळवा येथे सभा झाली होती, मात्र यंदा पहिल्यांदाच संयुक्त प्रचाराचा भाग म्हणून राज ठाकरे मैदानात उतरत आहेत. उपमुख्यमंत्री एकनाथ शिंदे यांचा बालेकिल्ला मानल्या जाणाऱ्या या शहरात राज ठाकरे कोणावर ‘ठाकरी’ शैलीत टीका करतात, याकडे सर्वांचे लक्ष लागले आहे.
२४ तासांत घरवापसीची राजकीय नाट्यकथा
मिरा-भाईंदरमध्ये राजकीय घडामोडींना वेग आला असून भाजपच्या माजी नगरसेविका अनिता मुखर्जी यांनी अवघ्या २४ तासांत घरवापसी केली आहे. उमेदवारी नाकारल्याने नाराज झालेल्या मुखर्जी यांनी मंगळवारी परिवहनमंत्री प्रताप सरनाईक यांच्या उपस्थितीत शिवसेनेत प्रवेश केला होता. मात्र बुधवारी त्यांनी पुन्हा भाजपमध्ये प्रवेश करत सर्वांनाच धक्का दिला.
मिरा-भाईंदर महापालिकेच्या प्रभाग क्रमांक १३ मधून त्या याआधी नगरसेवक होत्या. या निवडणुकीत शेवटच्या क्षणी त्यांचे तिकीट कापून त्यांच्या जागी प्रीती जैन यांना संधी देण्यात आली. यामुळे काही दिवसांपासून नाराजीची चर्चा होती आणि त्याच असंतोषातून त्यांनी पक्षांतराचा निर्णय घेतल्याचे बोलले जात होते.
