Nashik Election: राज्यात निवडणुकीची रणधुमाळी सुरू असतानाच नाशिक (Nashik) शहरात एक धक्कादायक प्रकार समोर आला. महापालिका निवडणुकीच्या अर्ज माघारीच्या दिवशीच भारतीय जनता पक्ष (Bharatiya Janata Party) च्या अंतर्गत वादाने अत्यंत टोकाची पातळी गाठली. शहरातील नवीन विभागीय कार्यालयात दोन गट आमनेसामने आले आणि पाहता पाहता शब्दांची झटापट थेट हाणामारीत बदलली.

या गोंधळाच्या केंद्रस्थानी बाळकृष्ण शिरसाट (Balkrishna Shirsat) होते. प्रभाग क्रमांक ३१ साठी अधिकृत उमेदवार म्हणून ते निवडणूक निर्णय अधिकाऱ्यांच्या कार्यालयात उपस्थित असतानाच, उमेदवारी न मिळाल्याने नाराज झालेले देवानंद बिरारी (Devanand Birari) आणि वंदना बिरारी (Vandana Birari) अर्ज मागे घेण्यासाठी तेथे दाखल झाले. एकमेकांकडे पाहून टोमणे, नजरा आणि कुजबुज सुरू झाली अन् काही क्षणांतच वातावरण हाताबाहेर गेलं.

कार्यालयातच लाथाबुक्क्यांची बरसात

सुरुवातीला किरकोळ शाब्दिक वाद झाला, मात्र तो इतका वाढला की निवडणूक कार्यालयातच एकमेकांवर लाथा-बुक्क्यांचा वर्षाव सुरू झाला. उपस्थित अधिकारी, कर्मचारी आणि कार्यकर्ते क्षणभर सुन्न झाले. निवडणूक प्रक्रियेच्या ठिकाणीच असा प्रकार घडल्याने परिसरात तणावाची स्थिती निर्माण झाली होती.

पोलिसांची मध्यस्थी, पण नुकसान झालंच

प्रकार चिघळत असल्याचे लक्षात येताच पोलिसांनी तातडीने हस्तक्षेप केला आणि दोन्ही बाजूंना वेगळं केलं. मात्र या घटनेमुळे पक्षातील अंतर्गत गटबाजी, तिकीट वाटपावरचा असंतोष आणि शिस्तीचा अभाव उघडपणे समोर आला आहे. निवडणुकीच्या तोंडावर अशी प्रतिमा तयार होणं पक्षासाठी अडचणीचं ठरू शकतं.

“एकही मत पडू देणार नाही” असा थेट इशारा

या हाणामारीनंतर नाराजी अधिकच वाढली. एका गटाकडून अधिकृत उमेदवाराविरोधात प्रभागात काम न करण्याचा थेट इशारा देण्यात आला, तर दुसऱ्या बाजूने पोलिसांकडे तक्रार दाखल करत कायदेशीर मार्ग स्वीकारण्यात आला आहे. प्रकरणाचा तपास सुरू असून, या वादाचे राजकीय पडसाद येत्या काळात अधिक तीव्र होण्याची शक्यता व्यक्त केली जात आहे.

भाजपसाठी डोकेदुखी वाढण्याची शक्यता

बाहेरून शिस्तबद्ध आणि संघटित दिसणाऱ्या पक्षात आतून इतका मोठा स्फोट होणं, ही नाशिकच्या राजकारणात मोठी चर्चा ठरत आहे. उमेदवारीवरून झालेला हा संघर्ष निवडणुकीच्या निकालावर किती परिणाम करतो, याकडे आता सगळ्यांचं लक्ष लागलं आहे.