Rupali Chakankar : मुंबईत नरिमन पॉईंटवरील हॉटेल ट्रायडेंट येथे महाराष्ट्र राज्य महिला आयोग आणि राष्ट्रीय महिला आयोग, नवी दिल्ली यांच्या संयुक्त विद्यमाने राष्ट्रीय स्तरावरील महिला आयोग परिषद आयोजित करण्यात आली. या शक्ती संवाद कार्यक्रमाला राज्याचे मुख्यमंत्री देवेंद्र फडणवीस (Devendra Fadnavis CM) यांची प्रमुख उपस्थिती होती. तसेच व्यासपीठावर राष्ट्रीय महिला आयोगाच्या विजया राहाटकर (Vijaya Rahatkar NCW), राज्य महिला आयोगाच्या अध्यक्षा रुपाली चाकणकर (Rupali Chakankar chairperson), मंत्री राम शिंदे (Ram Shinde minister), विधानसभा अध्यक्ष राहुल नार्वेकर (Rahul Narwekar speaker) आणि उपसभापती निलम गोऱ्हे (Neelam Gorhe deputy speaker) हे मान्यवर उपस्थित होते.

महिला आयोगाच्या कामगिरीवर रुपाली चाकणकरांचा भर

या परिषदेत बोलताना रुपाली चाकणकर यांनी महिला आयोगाच्या गेल्या काही वर्षांतील कामगिरीचा आढावा घेतला. मागील तीन दशकांपासून आयोग सातत्याने महिलांच्या न्यायासाठी कार्यरत असून, राज्यातील वेगवेगळ्या भागांतून आलेल्या प्रतिनिधींशी संवाद साधून मार्गदर्शन करण्यात येत असल्याचं त्यांनी सांगितलं.

त्यांनी पुढे सांगितलं की, दोन दिवस चाललेल्या प्रशिक्षण शिबिरात आयसी कमिटीच्या कामकाजावर मार्गदर्शन करण्यात आलं. महिलांच्या मानसिक आरोग्यावरही आयोग गंभीरपणे लक्ष केंद्रित करणार आहे. जनसुनावणीच्या माध्यमातून महिला आयोगाने अनेक तक्रारी सोडवल्या आहेत. जसं फायर ऑडिट आणि आर्थिक ऑडिट केलं जातं, तसंच खासगी कंपन्यांमध्ये आयसी ऑडिट अनिवार्य असायला हवं, अशी मागणी त्यांनी यावेळी केली.

बालविवाह व मानव तस्करीविरोधात कठोर भूमिका

राज्यात बालविवाहाचे प्रमाण वाढत असल्याचं सांगून त्यावर तातडीने उपाययोजना करणं गरजेचं असल्याचं चाकणकर यांनी स्पष्ट केलं. त्याचबरोबर मानव तस्करीच्या घटनाही चिंताजनक प्रमाणात वाढत असल्याने त्याविरोधात शून्य सहिष्णुतेची भूमिका घेऊन कारवाई केली जाईल, असा ठाम संदेश त्यांनी दिला. यावेळी त्यांनी मुख्यमंत्री देवेंद्र फडणवीस यांचा उल्लेख करत, “ते आमच्या पाठीशी आहेत, त्यामुळे आम्ही ठामपणे या आव्हानांचा सामना करू,” असं स्पष्ट केलं. याच संदर्भात बोलताना त्यांनी महाराष्ट्रातलं सरकार हे जणू ब्रह्मा-विष्णू-महेशाचं सरकार आहे, अशी देवतांची उपमा दिली.

आदिती तटकरेंकडून महिला आयोगाचं कौतुक

या परिषदेत महिला व बालकल्याण मंत्री आदिती तटकरे (Aditi Tatkare minister) यांनीही महिला आयोगाच्या कामाचं कौतुक केलं. त्यांनी सांगितलं की, मागील काही वर्षांत आयोगाने महिलांच्या सुरक्षेसाठी महत्त्वपूर्ण पावलं उचलली आहेत. मेटासोबत सामंजस्य करार करून महिलांच्या ऑनलाइन सुरक्षेसाठी पुढाकार घेण्यात आला आहे. तसेच महिलांसाठी प्रशिक्षण शिबिरे, मिशन उत्कर्षसारखी उपक्रम राबवून आयोगाने ग्राऊंड लेव्हलवर चांगली कामगिरी केली आहे.

“महिला आयोग हा केवळ संस्थाच नाही, तर तो महिलांच्या हक्कांसाठी आणि सुरक्षेसाठी उठणारा ठोस आवाज आहे,” असं आदिती तटकरे यांनी ठामपणे सांगितलं.