Nana Patole: महाराष्ट्र विधानसभेच्या पावसाळी अधिवेशनात दुसऱ्याच दिवशी काँग्रेस (Congress) पक्षाचे नेते नाना पटोले (Nana Patole) यांनी सत्ताधारी पक्षावर तीव्र शब्दांत हल्लाबोल केला. त्यांनी भाजप (BJP) आमदार बबनराव लोणीकर (Babanrao Lonikar) आणि कृषीमंत्री माणिकराव कोकाटे (Manikrao Kokate) यांच्यावर शेतकऱ्यांविरोधात वागल्याचा आरोप केला.

सभागृहात बोलताना नाना पटोले यांनी स्पष्टपणे सांगितले, “मोदी तुमचे वडील असतील, पण ते राज्यातील शेतकऱ्यांचे वडील होऊ शकत नाहीत.” त्यांनी मुख्यमंत्री एकनाथ शिंदे (Eknath Shinde) यांना शेतकऱ्यांची माफी मागण्याची मागणी केली. या संतप्त प्रतिक्रियेनंतर ते थेट अध्यक्षांच्या आसनासमोर गेले.

या कृतीनंतर विधानसभा अध्यक्ष राहुल नार्वेकर (Rahul Narwekar) यांनी त्यांना एका दिवसासाठी निलंबित केले. विरोधकांनी याचा निषेध नोंदवत आंदोलन केलं.

पत्रकार परिषदेत नाना पटोले यांचा आणखी घणाघात

निलंबनानंतर घेतलेल्या पत्रकार परिषदेत नाना पटोले अधिक आक्रमकपणे बोलले. त्यांनी सत्ताधाऱ्यांवर टीका करत म्हणाले, “महायुती सरकार म्हणजे माज आलेलं सरकार आहे. २०१४ पूर्वी बबनराव लोणीकर उघडे फिरायचे. आज त्यांच्यासोबत फक्त दोन बायका आहेत, असं चित्र आहे.”

ते पुढे म्हणाले की, “भाजपचे काही आमदार म्हणतात, शेतकऱ्यांच्या कुटुंबियांना कपडे, चप्पल, चड्डी, बनियन आणि सुरक्षा केंद्र सरकारकडून दिली जाते. या वक्तव्यांमुळे शेतकऱ्यांचा अपमान होतो आहे. जो शेतकऱ्यांसाठी आवाज उठवतो, त्याला निलंबित केलं जातं. पण ज्यांनी अपमान केला, त्यांना मानाने बसवलं जातं.”

शेतकऱ्यांसाठी लढा सुरूच राहणार

नाना पटोले यांनी यावेळी स्पष्ट केलं की, “मी कोणतीही चूक केलेली नाही. शेतकऱ्यांच्या विरोधात वागणाऱ्या सरकारविरोधात आमचा लढा सुरू राहणार.” त्यांनी सांगितलं की, “शेतकऱ्यांना कर्जमाफी मिळालेली नाही, नैसर्गिक आपत्तीत नुकसान झालं तरी सरकारकडून मदत मिळालेली नाही. भाजप आणि त्यांच्या सहकाऱ्यांनी शेतकऱ्यांचा अपमान थांबवला पाहिजे.”